Durrës, Vokshi takon banorë të fshatit Xhafzotaj

Kandidatja për deputete në qarkun e Durrësit, znj. Albana Vokshi ka zhvilluar një tur takimesh me banorë të 2 lagjeve të fshatit Xhafzotaj, të komunës Rrashbull. Znj.Vokshi bisedoi me banorët për problemet dhe shqetësimet me të cilat ata përballen si dhe mundësitë e zgjidhjes së tyre gjatë mandatit të dytë qeverisës të Partisë Demokratike.

Duke u ndalur në arritjet e qeverisë znj.Vokshi theksoi se gjatë këtij 4 vjeçari, janë kryer shumë investime, në arsim, shëndetësi, infrastrukturë. Në fjalën e saj, znj.Vokshi përmendi veprën më madhore dhe më të suksesshme të realizuar gjatë qeverisjes z. Berisha, rrugën Durrës-Kukës, e cila jo vetëm është rruga e Kombit, por edhe rruga e zhvillimit pasi do të sjellë më shumë investime, më shumë mirëqënie për të gjithë dhe sidomos për banorët e Durrësit.

Gjithashtu ajo siguroi banorët se shqetësimet e tyre në lidhje me furnizimin me ujë të pijshëm, përmirësimin e infrastrukturës do të gjejnë zgjidhje brenda vitit të parë të mandatit qeverisës të Partisë Demokratike.

Më pas znj.Vokshi u fokusua në mbështetjen e dhënë nga qeveria demokratike për forcimin dhe mbrojtjen e gruas në shoqëri “Do të jem zëri juaj në Parlament, jo vetëm i burrave, por edhe grave sepse si nënë, si bashkëshorte, e di rëndësinë dhe rolin e gruas në familje.

Qeveria demokratike gjatë mandatit të ardhshëm do të vazhdojë të mbështesë dhe promovojë fuqishëm rolin e gruas në shoqëri dhe në zhvillimet ekonomike, sociale dhe politike të vendit pasi duke punuar më shumë për gratë në punojmë më shumë për fëmijët, punojmë më shumë për të ardhmen e tyre, punojmë më shumë për të ardhmen e Shqipërisë”- u shpreh znj.Vokshi.

Berisha: Qeveria do të zbatojë praktikat më të mira për zhvillimin e biznesit

Drejtori Ekzekutiv i Raiffeisen Bank për Shqipërinë, z. Oliver Whittle, u shpreh se niveli i ulët i inflacionit është inkurajues për sektorin privat në Shqipëri

 

Kryeministri Berisha zhvilloi dje një bashkëbisedim me përfaqësues të institucioneve financiare ndërkombëtare dhe të biznesit vendas e të huaj, në një nga seksionet e konferencës ekonomike me temë “Tryeza e Tretë e Rrumbullakët me Qeverinë e Shqipërisë. Për investime të frytshme”, e organizuar në Tiranë nga grupi prestigjioz "The Economist". Kjo konferencë zhvillohet për të tretin vit radhazi në Shqipëri dhe ka si qëllim shkëmbimin e ideve për zhvillimin e biznesit.

Në fjalën e tij, Kryeministri Berisha bëri një ekspoze të zhvillimeve ekonomike në Shqipëri dhe të reformave të ndërmarra nga qeveria shqiptare në kuadër të krijimit të një klime sa më të favorshme për biznesin. “Ekonomia shqiptare është dinamike dhe shumë entuziaste. Rritja ekonomike gjatë këtij 6-mujori ka qenë dy shifrore, me 11 përqind. Eksportet, prodhimet ‘Made in Albania”, janë rritur me 32 përqind. Numri i turistëve këtë vit ka arritur në 2 milionë, ndërkohë që në vitin 2004 numri i turistëve ishte 200 mijë. Inflacioni është mbajtur në nivelin 2.7 përqind. Ka një rritje të madhe të investimeve të huaja në vendin tim”, u shpreh Kryeministri, ndërsa shtoi se “qeveria ime është e vendosur që të bëjë të vetat praktikat më të mira lidhur me klimën e biznesit”.

Kryeministri Berisha theksoi gjithashtu se kontributi kryesor i qeverisë është të luftojë korrupsionin. “Lufta kundër korrupsionit është shumë më e rëndësishme sesa çështje të tjera. Ne do të bëjmë çdo gjë në këtë aspekt”, vijoi Kryeministri. Më tej, Kryeministri Berisha theksoi se Shqipëria është vërtet një vend i vogël, por ka potenciale të mëdha për tu shfrytëzuar.

Në vijim, Kryeministri Berisha dhe të pranishmit në këtë konferencë diskutuan për çështje të ndryshme lidhur me zhvillimin e ekonomisë në Shqipëri, si dhe për fushat ku investitorët janë të interesuar të zhvillojnë biznesin e tyre.

Drejtori Ekzekutiv i Raiffeisen Bank për Shqipërinë, z. Oliver Whittle, vlerësoi se ekonomia shqiptare ka ecur dhe është pozicionuar shumë mirë brenda një kohe të shkurtër. Zoti Whittle u shpreh gjithashtu se niveli i ulët i inflacionit është inkurajues për sektorin privat në Shqipëri.

Ndër të tjera, Kryeministri Berisha u shpreh;

“Së pari dëshiroj të falënderoj organizatorët e Konferencës Ekonomike, të kësaj ngjarje të madhe për Shqipërinë. Gjithashtu dua të mirëpres të gjithë pjesëmarrësit dhe biznesmenët pjesëmarrës në këtë konferencë. Kjo konferencë po zhvillon punimet në një kohë kur bota ndeshet me probleme serioze ekonomike në një krizë dhe një gjë e tillë të çon në një recesion të ekonomisë.

Prandaj të gjithë duhet të mendojnë për këtë krizë, duke pasur parasysh secilin vend dhe çdo rajon. Por pavarësisht nga ajo që ka ndodhur në metropolet kryesore financiare, Ballkani dhe Shqipëria ende janë të qetë përsa i përket sistemit bankar. Shqipëria ka një performancë shumë të mirë. Likuiditeti është shumë i mirë dhe nuk ka ndonjë impakt mbi njerëzit, të cilët kanë besim. Depozitat e kursimeve po rriten dhe kjo për shkak se sistemi bankar në Shqipëri ka funksionuar në mënyrë normale dhe korrekte. Ky sistem nuk u prek nga virusi i lakmisë dhe kjo është një arsye e rëndësishme që kjo konferencë zhvillohet në Shqipëri.

Më lejoni t’ju prezantoj gjendjen e Shqipërisë sot. Ekonomia shqiptare është dinamike dhe shumë entuziaste. Rritja ekonomike gjatë këtij 6-mujori ka qenë dy shifrore, 11 përqind. Eksportet, prodhimet ‘Made in Albania”, janë rritur me 32 përqind. Numri i turistëve këtë vit ka arritur në 2 milionë, ndërkohë që në vitin 2004 numri i turistëve ishte 200 mijë. Inflacioni është mbajtur në nivelin 2.7 përqind. Ka një rritje të madhe të investimeve të huaja në vendin tim. Shifra e investimeve në fushën e energjisë, për projekte që janë kontraktuar ose janë në kontraktim e sipër, arrin në rreth 400 milionë euro. Investimet e kompanisë “Seament” arrin në rreth 750 milionë euro. Po kështu kontrata të tjera vazhdojnë të negociohen në fushën e energjisë, në miniera, në manifakturë, etj..

Qeveria ime po bën çdo gjë për të përmirësuar dhe lehtësuar klimën e biznesit në vend. Në këtë kontekst ne punuam për të lehtësuar barrën burokratike mbi biznesin dhe mendoj se këtë e arritëm. Koha e regjistrimit të biznesit është shkurtuar nga dy ditë në gjysmë ore. Po kështu edhe taksën e regjistrimit e kemi kufizuar nga 7000 euro në 1 euro. Ne kemi reduktuar me 2/3 numrin e lejeve dhe licencave dhe në muajt që vazhdojnë do të punohet për zhvendosjen e procedurave në ‘one stop shop’.

Qeveria ime është e vendosur që të bëjë të vetat praktikat më të mira lidhur me klimën e biznesit. Raporti i Bankës Botërore “Doing Business” për këtë vit e renditi Shqipërinë në vend të dytë lidhur me reformat që po zbatohen. Po kështu dhe lidhur me mbrojtjen e investimeve ne jemi në vendin e 12-të në botë.

Për regjistrimin e biznesit ne jemi të tetëmbëdhjetë apo të shtatëmbëdhjetë në botë. Lidhur me kreditimin ne jemi në vendin e katërmbëdhjetë. Ne kemi arritur nëntëdhjetë e gjashtë pikë lidhur me lirinë fiskale, por ende kemi shumë për të bërë dhe po i hedhim hapat një nga një. Angazhimi im është që në këtë vend do të zbatohen strategjitë më të mira. Dhënia e lejeve të ndërtimit është në gjendje shumë të keqe. Koha për marrjen lejes së ndërtimit është 330 ditë, por kjo do të përmirësohet duke arritur në afatin më të shkurtër, si Singapori. Shkurtimi i praktikave burokratike do të zbatohet në të gjitha fushat. Të gjitha këto janë në interesin më të mirë të biznesit. Ne kemi vendosur taksën e sheshtë në nivelin 10 përqind. Nga 1 janari 2009 taksa sociale do të zbresë me 50 %. Kjo ndodh sepse një nivel më i ulët i taksave është më i dobishëm për njerëzit në sektorin publik.

Së dyti të shohim rezultatet e arritura pas tre vjetësh. Ne kemi ulur taksat më shumë se çdo vend tjetër në Evropë apo më gjerë. Njëkohësisht kemi rritur të ardhurat në buxhet në masën 32 përqind. Këto të ardhura nuk erdhën nga nafta apo gazi, por ato vijnë nga lufta kundër korrupsionit, informalitetit, evazionit fiskal, prej të gjithave së bashku. Kjo luftë u lehtësua shumë fale politikës fiskale të ndjekur.

Shqipëria është një vend i vogël. Këtë ju mund ta shihni në hartë, por është një vend me potenciale të mëdha për tu shfrytëzuar. Shqipëria është një vend i bukur, i mrekullueshëm, me male madhështore. Shqipëria është një vend i pasur me burime hidrike dhe ka potenciale për ndërtimin e 400 hidrocentraleve. Shqipëria është një vend i rëndësishëm për depozitat e kromit, por ka gjithashtu dhe hekur.

Një vit më parë ne kemi inauguruar në Shkodër kompaninë italiane “Cottonela” dhe Presidenti i kësaj kompanie më tha se në rast se ne do të zbatoni këtë politikë fiskale atëherë ky vend do të shndërrohet në parajsë. Unë këtë e zbatova dhe Shqipëria është shndërruar në parajsë, madje diçka më shumë sepse parajsa është hyjnore. Por, ka ende shumë punë për të bërë. Ne nuk do të kursejmë përpjekjet për t’ju krijuar një jetë shumë të mirë.

Shqipëria po ndryshon, 800 km rrugë në ndërtim

Qeveria disponon të gjitha fondet për realizmin e çdo projekti që nevojitet për të ndërtuar një infrastrukturë moderne evropiane, nga Orikumi tek Kepi i Stillës. Kryeministri Berisha garantoi dje banorët e zonave të bregut, nga Saranda në Vlorë, se qeveria e tij do të mbështesë çdo projekt që synon zhvillimin e kësaj zone, rritjen e numrit të turistëve dhe përmirësimin e jetës së banorëve që jetojnë përgjatë vijës bregdetare të Jonit.

Në këtë kontekst, kreu i ekzekutivit e vuri theksin në punimet që po vazhdojnë për ndërtimin e rrugës së bregut, e cila siç vlerësoi kreu i ekzekutivit, përbën një nga rrugët më të rëndësishme për mbarë vendin. “Ky vit ka pasur prurjen më të madhe të turistëve se ndonjëherë më parë në historinë e vendit. Ju garantoj se përfundimi i kësaj rruge dhe i projekteve të tjera do ta shumëfishojë numrin e turistëve në bregun e Detit Jon dhe në Shqipëri”, u tha kreu i ekzekutivit banorëve të fshatrave të bregdetit gjatë një takimi që zhvilloi me ta. Duke përshëndetur të gjithë banorët e bregut, Berisha theksoi se vizita e tij ishte në kuadrin e inspektimit të punimeve të rrugës së bregut, e cila përbën një nga rrugët absolutisht më të rëndësishme për mbarë vendin.

Gjithashtu, kreu i ekzekutivit e vuri theksin edhe tek një sërë projektesh në fshatrat përgjatë bregdetit, duke nënvizuar se ato po nxisin zhvillimin e kësaj zone me ritme të shpejta. “Sot isha në Borsh, inauguruam një rrugë dhe diskutuam për projekte të tjera, por vetëm Borshi, sikurse më informuan bashkëbiseduesit e mi, ka kapacitete edhe për 30 mijë turistë. Ne do të përfundojmë rrugën në prillin e vitit të ardhshëm. Ndërkohë, dua të përgëzoj kompanitë për punën e bërë deri më sot, sepse siç e shihni, këto janë ritmet më të shpejta të punimeve në krahasim me të gjithë ndërtimet që janë bërë në Shqipëri”, ka theksuar kreu i ekzekutivit. Kryeministri vlerësoi maksimalisht cilësinë e projekteve, duke theksuar se duhet bërë më e mira në cilësi dhe më e shpejta e mundshme në afate.

E tërë trajektorja, tha ai, do të përfundojë në prillin e ardhshëm, por duke patur parasysh stinën, kompanitë mund të avancojnë në përfundimin e punimeve, duke i përfunduar në shkurtin që vjen. “Ne do t’u jemi shumë mirënjohës për përfundimin e punimeve para afatit. Prandaj kompanitë të punojnë me tre turne dhe t’ia bëjnë këtë dhuratë Bregut dhe tërë Shqipërisë, sepse këtu ne përfaqësohemi dhe duhet të përfaqësohemi me një fytyrë të vërtetë evropiane, me një infrastrukturë të nivelit të zhvilluar të një vendi të qytetëruar”, u shpreh kryeministri Berisha, duke ritheksuar edhe njëherë interesin e madh të qeverisë për ndërtimin e rrugëve të reja sepse, sipas tij trashëgimnia e gjetur në infrastrukturë lë shumë për të dëshiruar.

Trashëguam, tha kryeministri, rrugë që dënojnë njerëzit, rrugë që pengojnë zhvillimin, rrugë që janë jashtë të gjitha standardeve, por e rëndësishme është që ne do t’i ndërtojmë dhe jemi duke i ndërtuar. Sot, vlerësoi ai, janë rreth 800 kilometra rrugë kombëtare, autostrada dhe superstrada në ndërtim e sipër.

Masterplani për bregdetin e Jonit, me kritere të standardeve të larta

Bregdeti i Jonit do të jetë një nga brigjet më të preferuara të botës për vizitorët. Kryeministri Berisha duke iu referuar masterplanit për këtë pjesë të bregdetit të vendit tha se mikpritja e zonës, bukuritë e rralla, investimet në infrastrukturë dhe planet turistike sipas standardeve më të larta pritet ta shndërrojnë Bregdetin e jugut në një vend vërtet tërheqës në Mesdhe. “Planet turistike po i bëjmë, infrastrukturën po e ndërtojmë dhe ju siguroj se ky do të jetë një nga brigjet më të preferuara të tokës për vizitorët.

Ju keni mikpritjen tradicionale. Jeni njerëz të zotë, punëtorë, njerëz të sakrificës dhe unë jam i bindur që do t’ia dilni ta bëni Bregun një nga vendet më të zhvilluara të Mesdheut dhe më gjerë”, iu drejtua më tej kreu i ekzekutivit banorëve të fshatrave të bregut jonian. Ai garantoi se zhvillimi i turizmit është prioritet për këtë qeveri. “Në këtë vit, investohen rreth 1.2 miliard dollarë në rrugë dhe unë ju siguroj se me këto ritme, pas 3-4 vitesh, Shqipëria do të ketë rrjetin rrugor më të ri dhe ndër më të mirët që meriton”, u shpreh kreu i qeverisë, duke shtuar se masterplani për Bregun e Jonit është jashtëzakonisht i studiuar, i cili me kritere të sakta të standardeve më të mira u përcakton autoriteteve vendore dhe komunitetit, të drejtën e hartimit të planeve të zhvillimit të fshatrave, të bashkisë dhe këtyre zonave.

“U bëj thirrje që me përkushtimin më të madh të zgjidhni studiot më të mira, sepse keni një shans historik për të ndërtuar perla të vërteta, për të bërë ndërtimet më të mira dhe për ta bërë të famshëm këtë breg në të gjithë botën, sepse disa tipare i ka të pashoqe”, nënvizoi më tej numri një i ekzekutivit.